Ita uza lian saida los?

Iha n.º 1, artigu 13.º Konstituisaun nian hakerek dehan katak lian ofisiál Timor-Leste nian mak tetun ho portugés. Tuir lolos, iha Timor-Leste laran tomak tenki ser uza lian rua ne’ebe temi iha kotuk. Maibe realidade hatudu katak, dala barak, sidadaun ne’ebe hela iha Timor-Leste “haluha” uza lian ofisiál no gosta liu uza lian indonézia ho inglés.

41th ka 41st? La domina lian inglés maibe hakarak nafatin hakerek ho lian inglés.

Problema mak wainhira ita la domina lian estranjeiru mak mosu fali sala iha ita nia dokumentu, jornal, mensajen no seluk tan.

Maibe laos de’it ema mak sala. Ita mos bele fo’o sala ba Governu, tamba parese nunka iha interese atu dezenvolve lian portugés iha Timor-Leste, tan ne’e mak to’o agora universidade balun sei hanorin uza lian indonézia, iklan, buku, tv no radio balun sei uza lian indonézia.

Hanesan ne’e karik di’ak. Uza lian ofisiál rua no lian estranjeiru ida.

Podia nain ulun bo’ot sira hari’i politika ida hodi obriga ema hotu-hotu atu uza lian ofisiál iha fatin hotu-hotu no iha meius hotu-hotu, hanesan ministerius, ospitál, eskola, universidade no buku, iklan, tv, jornal, avizu no seluk tan. Liu-liu aplika ba malae bo’ot sira tamba dala barak sira mos gosta uza lian inglés ka indonézia iha eventu nasionál no internasionál. Hanesan ne’e bebeik, bainhira mak ita afirma ita nia identidade?

Hakerek portugés sala laiha buat ida. Importante mak hakerek ho lian portugés.

Maske dala ruma susar, diak liu ita koko uza nafatin lian ofisiál hodi aprende, hodi aumenta ita nia matenek ba lian ofisiál to’o loron ida ita mak hanorin ita nia lian ba ita nia povu, duke ita aprende lian estranjeiru maibe lahatene fali lian ofisiál.

Iha prosesu dezenvolvimentu lian ofisiál iha Timor-Leste, ita hotu alunu no ita hotu profesór.

Marry Christmas

Sei falta fulan 3 atu Natal, maibe loja nain ne’e tara ona iha loja banner kona-bá Natal. Sala mak hakerek “marry”, laos “merry” fali. Katak loja nain hakarak kliente sira atu kaben ho Natal.

Kaben ho ema karik di’ak, ba kaben ho loron ne’e buat foun iha mundu tomak, maibe hahu uluk iha Xina ne’eba, tamba loja fan sasan mai husi Xina, loja nain ema Xina no banner mos hakerek tuir inglés xina nian. Mate ka lae?

Taka Facebook rezolve saida lós?

Señor Deputadu Leonel Marçal, ita boot hanesan deputadu podia hatene oituan kona-bá direitus, liberdades no garantias ne’ebe hakerek iha Konstituisaun Timor-Leste nian.

Konstituisaun hanesan lei-inan no lei ne’ebe aas liu iha Timor-Leste. Iha lei ne’e hakerek dehan katak ema hotu-hotu iha direitu atu liberdade de expressão, katak ema hotu-hotu iha direito atu hateten sai saida deit mak hakarak hateten, bele liu husi Facebook, blog, jornal, televizaun ka buat seluk tan. No mos wainhira ema uza liberdade ne’e atu tolok ema ka hafoer ema nia naran, vítima bele uza lei hodi foti medidas hasoru ema tolokten, laos medidas hasoru ema hotu-hotu inklui ema ne’ebe la halo sala ida.

Tamba medidas señor deputadu hakarak mak taka Facebook, maibe ida ne’e afeta ba ema hotu-hotu ne’ebe uza Facebook. Ne’e la justo, tamba uzer Facebook barak uza programa ne’e ba buat ida ke diak, laos ba hateten sai liafuan hodi estraga imajen Nasaun.

Se karik señor deputadu sei nafatin ho hanoin hanesan ne’e, la kleur tan ita tenki taka aeroporto tamba malae sira mai lori aimoruk droga tama ba Timor-Leste, tenki bandu ema hotu-hotu uza kareta ka motor tamba barak halai la hatene regras, tenki taka polisia tamba baku jornalista arbiru, tenki taka Governu tamba estrada barak, hospital no eskola seidauk hadia no tenki taka mos Parlamentu tamba deputadu koalia arbiru.

Se señor deputadu hakarak par ema hatudu lalahok diak iha Facebook, diak liu señor deputadu sai profesór deit ona, tamba mudansa ba komportamentu ka hahalok no mos mudansa ba hanoin ema ninian sei akontese liu hosi prosesu hanorin no aprendizajen.

Sé lós mak la fo’o valor ba bandeira RDTL?

juventude_bandeira

Deputadu balun kondena maka’as hahalok grupu juventude balun ne’ebe hakerek ‘buradu’ bandeira RDTL.

Tuir lolos Señor Deputadu sira, juventude la hakerek “buradu” ida, maibe sira hakerek assina iha bandeira.

Deputadu Manuel Castro, Manuel Guterres no Natalino dos Santos lamenta tebes tanba hahalok ne’e la valoriza simbolu nasaun nian, ne’ebe maka povu rihun ba rihun sosa ho ruin, ran no isin lolon.

Señor Deputadu sira, hahalok ne’e laos sira halo tamba la fo’o valor ba bandeira RDTL, maibe tamba bandeira ne’e mak símbolu ne’e dunik mak juventude assina bandeira.

Deputadu hirak ne’e sublinha katak aktu hakerek ‘buradu’ bandeira RDTL ne’e krime tanba ne’e Polisia Nasional Timor-Leste bele foti ona medidas ruma.

Señor Deputadu sira, podia imi nain tolu hateten sai krime riska buradu ne’e hakerek iha Kódigu Penál iha seksaun saida no artigu nómor hira? Tamba, tuir lolos, krime saida dei’t mak iha, hakerek iha Kódigu Penál. Wainhira la hakerek iha Kódigu Penál, jadi ne’e laos krime ida. Atan oan hau ajuda lai deputadu sira: parese krime ne’e hakerek iha artigu 206 iha Kódigu Penál, koalia kona-bá ultraje ba símbolu nasionál. Iha ne’e koalia kona-bá “ofende bandeira”, maibe labarik sira la ofende bandeira ida, sira hatudu sira nia kontente no orgullu liu husi asina bandeira. Nune’e krime iha ne’ebe los?

Brigadeiru-Jenerál Filomeno Paixão hateten katak juventude tenki respeita bandeira nasionál no señor Primeiru-Ministru mos mai deklara katak presiza buka hatene, tanba saida mak sira pinta estraga bandeira ne’e.

No atan oan hau husu: juventude mesak mak tenki respeita bandeira RDTL ka ema hotu-hotu? Nusa la buka hatene mos tamba saida mak Xanana Gusmão pinta estraga bandeira RDTL?

21591d_18506bf926dd4c1ab9cb7e29b3403a49
Arte ka krime?

Agora daudaun polisia komesa ona halo investigasaun ba aktu ida ne’e. Podia mos investiga ema ne’ebe gambar iha bandeira hanesan hatudu iha foto. Tamba ema ne’e gambar iha bandeira, depois dehan ne’e arte. Nusa la investiga?

139295589
Ne’e krime ka lae Señor Deputadu sira? Ka lei la aplika ba ema boot sira?

Iha fatin barak iha Díli laran ita bele hare ho matan bandeira RDTL nakles. Bandeira RDTL merese dunik respeitu husi ema hotu-hotu, maibe Señor Deputadu sira labele mai hakilar iha media katak juventude sira nia hahalok la diak no la respeita bandeira RDTL. Se atu hakilar, diak liu hakilar ema ne’ebe uluk hakerek ka gambar iha bandeira RDTL, no ema ne’ebe husik bandeira RDTL to’o nakles, no mos ema ne’ebe faan bandeira RDTL ho kor sabraka nian duke kor kinur. Rezolve tia lai problema hirak ne’e, depois bele mai hakilar juventude sira no kesar ba polisia.

Lakon ka la lakon nasionalidade?

​“Sira ne’e laos Timor oan, tuir kartaun eleitoral Indonesia nian ne’e sira ne’e ema Indonesia ona (…)”. Liafuan ne’e mai husi Señor Deputadu Antonino Bianco. Tuir Señor Deputadu, membru UNTAS (União Nacional Timor Aswain) laos ona Timoroan.

Señor Deputadu seidauk halo analiza didiak karik. Lei Indonesia nian bandu ema iha nasionalidade ida tan wainhira iha ona nasionalidade Indonesia. Maibe lei Timor-Leste nian aseita ema nasional iha nasionalidade ida ka rua tan. Katak, iha Indonesia, Timor oan sira neebe iha nasionalidade Indonesia labele iha nasionalidade seluk tan, maibe wainhira sira iha rai Timor-Leste, lei fo dalan ba sira atu iha nasionalidade ida tan, mesmuke nasionalidade seluk mak Indonesia nian. Entaun, lakon ka lae nasionalidade?

Estrada no ponte Loomea rohan

Agora sé los mak atu responsabiliza ba ida ne’e? Ka atu fo’o sala ba udan tamba bo’ot demais?

Governu tinan-tinan gasta osan rihun ba rihun maibe rezultadu mak nune’e.

Emprezáriu nasionál protes los hakarak manan projetu, maibe rezultadu mak nune’e.

Manan projetu dehan hakarak kontribui ba dezenvolvimentu Nasaun ninian, maibe rezultadu mak nune’e.

Loron ba loron rezultadu mak nune’e. To’o bainhira los?

Foto hirak ne’e husi Facebook

Pizza ne’ebe diak liu iha Dili laran

Pizza! Hahan gostu ne’ebe mai hosi rai Itália.

wp-1467544725413.jpeg

Agora iha Díli laran restaurante balun mak tein no faan pizza. Maibe, ida diuk liu hotu-hotu mak pizza hosi restaurante ida naran Osteria Italiana.

wp-1467544837317.jpeg

Akonpaña ho serveja, coca-cola ka jus derok ida aumenta tan nia gostu.

wp-1467544937706.jpeg

Maibe buat ida mak ema servisu iha restaurante Osteria Italiana podia hare mak sira nia masmidar bein nakonu ho nehek. Wainhira hadia ida nee, furak liu tan.