Ami nia direitu ba “lae/lakoi”

mmortagua“Hai, o nia naran saida? – Deskulpa, hau la koñese o. Hau hamutuk o hau nia kolega sira. – Mai ona, hatete de’it o nia naran sa. – Hau lakoi koalia duni, deskulpa. – Lakoi? Tamba sá? – Hau lakoi… – Mai ona, hau hatene o hakarak sá! – Lae, hau lakoi, hau sibuk los. – O hanoin o mak kapas liu ona ka?”

Sai feto ne’e tenki hatete “lae” dala barak, tamba hatete “lae” dala ida de’it ne’e sei la to’o. Ami halo atu enkontru hirak ne’e, diálogu hirak ne’e sai naturál, to’o ikus ami hetan ami nia estratégia de defesa rasik. La hatudu an demais hodi halo ema barak hateke ita iha situasaun balun ka iha kolega balun hamrik besik ita hodi sira bele fo’o ajuda se karik situasaun sai komplikadu. Ami abitua ho sisi sira ne’e ne’ebe halo ita sente la konfortável hanesan mos sosiedade abitua fo’o deskulpa ba sisi sira ne’e. Tamba se hau mesak iha ne’eba, ne’e tamba hau hakarak koñese ema ruma. Tamba se hau dehan “lae”, ne’e tamba hau hakarak hatudu an katak susar atu hetan hau. Tamba se hau fihir o, ne’e tamba hau hakarak provoka o, no se hau hakarak provoka o, ne’e tamba ha’u hakarak buat ruma, maske hau dehan “lakoi”.

Ita la senti ona hanesan violasaun, maibe ne’e violasaun dunik, no violasaun ho forma oin-oin, ho kasar ne’ebe ita bele sukat oin-oin. Husi mane ida ne’ebe sisi ita iha bar to’o mane ida hakarak fo’o seksu, maske ita nunka husu ka hakarak. Husi mane deskoñesidu ne’ebe kona ita nia isin to’o ita nia kolega ne’ebe rei ita maske ita lakoi, karik mos to’o mai halo seksu maske ita lakoi, maibe, tamba razaun balun, akontese sem ke ema ida la obriga, razaun ida karik mak lanu todan. Hau hatene história barak ne’ebe atu hanesan ho história iha leten. Ne’e história husi hau nia kolega feto sira no, iha kazu balun, ne’e hau nia história mos.

Kultura violasaun laos moris de’it husi imagem agressiva e violenta ne’ebe lao hamutuk ho liafuan “violensia”. Liafuan piropo ne’ebe ita la husu, assédio light, sisi ne’ebe la konfortável ba ita, hahalok ne’ebe laiha konsentimentu, ne’e hotu mai husi prinsípiu ne’ebe hanesan. Prinsípiu katak liafuan “lae/lakoi” ne’ebe feto koalia, ninia valor la aas liu mane ninia hakarak. No mane sira iha direitu atu koalia sai sira nia hakarak, maske ida ne’e bele kontra feto nia direitu atu senti incomodada, atu lakoi sai alvo ba mane nia vontade.

Igualdade entre mane ho feto lao ba oin iha tinan ikus-ikus ne’e. Maibe iha direitu balun ke ita labele hetan de’it liu husi dalan legal, no iha mos prekonseitu balun ke sei iha nafatin no hetan atualizasaun. Direitu ba igualdade atu dehan “lae/lakoi” mak direitu ida husi direitu balun ne’e. Iha loron 25 fulan Maiu, pelo menos iha Lisboa no Porto, feto sira atu sai ba estrada atu dehan Lae ba Kultura Violasaun. Hein katak ita feto barak mak sei partisipa.

Mariana Mortágua, Deputada husi Bloco de Esquerda

Artigu orijinál ho lian portugés iha ne’e

Tinan 15: parabéns Timor-Leste

IMG_5703-copy

Loron 20 fulan Maiu tinan 2002: ha’u hamriik iha Tasi Tolu, hamutuk ho povu timor, hakilar “Viva Timor-Leste!”, hananu hino nasionál “Pátria” no sai sasin ba momentu Francisco Guterres Lú-Olo proklama restaurasaun independensia República Democrática de Timor-Leste ninian.

IMG_2511_copy

Loron 20 fulan Maiu tinan 2017: ha’u hamriik iha Tasi Tolu, hamutuk ho povu timor, hananu hino nasionál “Pátria” no sai sasin ba momentu Francisco Guterres Lú-Olo simu posse hanesan prezidente foun República Democrática de Timor-Leste ninian.

Parabéns Francisco Guterres Lú-Olo!

Parabéns Timor-Leste!

Rekomenda atu le: Timor Paraíso Violentado

Foin le’e hotu livru “Timor paraíso violentado” husi hakerek nain Fátima Guterres. Istória kona-bá hakerek nain ninia moris iha Timor-Leste iha tempu di’ak no mos iha tempu susar. Istória harekek nain ninian, maibe mos hola parte iha história Timor-Leste ninian. Istória ida ne’ebe hatudu feto timor ninia kapasidade atu luta, atu hasoru inimigu, atu halo sakrifísiu, atu enfrenta tortura, atu entrega an tomak ba rai Timor-Leste. Testemuñu ida ne’ebe reflete korajen no determinasaun feto timor sira; korajen no determinasaun povu Timor-Leste tomak atu luta ba libertasaun nasionál.

Husi sorin seluk, liu husi livru ida ne’e, ita bele hanoin no hatene Timor-Leste nia furak no nia riku soin, husi aifunan to animal, husi foho to ailaran. Furak no riku soin ne’ebe militar indonésia sama tuir sira nia gostu, no los dunik Timor-Leste sai “paraíso violentado”.

Maske violentado, liu husi le livru ida ne’e, ita aumenta ita nia fiar katak sira la terus atu ita kontinua terus, sira la mate atu ita moris iha rai ida ne’ebe nakonu ho korupsaun, sira la halo sakrifisiu bot hanesan ne’e atu ita sama ita nia maun alin ohin loron.

Ho esperiensia le livru ida ne’e, aumenta fiar katak luta seidauk hotu. Luta hasoru invasor hotu tiaona, maibe agora daudaun luta seluk ita tenki hasoru: hamlaha, dezempregu, analfabetismu, korupsaun no seluk tan. Luta tenki kontinua nafatin; ita determina ita nia inimigu, determina ita nia estratégia no lao ba oin hodi hasoru inimigu, luta hodi manan, hodi nune’e loron ida Timor-Leste la violentado ona, maibe paraíso los ona.

Kona-bá eleisaun xefi aldeia

Foin lalais realiza iha territóriu tomak eleisaun ba lideransa komunitária sira, inklui eleisaun ba xefi de suku no mos ba xefi aldeia.

Hare ba kazu balun ne’ebe mosu katak wainhira kandidatu ba xefi aldeia mak ema ida de’it, panitia sira desidi katak la presiza halo votasaun. Katak kandidatu úniku automátikamenti sai xefi aldeia.

Ne’e la los!

Tuir lolos votasaun tenki halo nafatin mesmo ke kandidatu úniku hodi nune’e kandidatu bele hetan legitimidade husi votante sira. Se lae, kandidatu úniku sai xefi aldeia maibe karik laiha apoiu husi komunidade aldeia ninian.

Kandidatu barak ka kandidatu úniku tenki hetan kargu liu hosi eleisaun, selae aban bain rua sai xefi mas la reprezenta komunidade.

R.I.P. Shimon Peres

Shimon Peres (2 Agostu 1923 – 28 Setembru 2016)

“Kona-bá dame, ita tenki hanoin katak: manu ida labele semu ho liras ida de’it, no ema ida labele basa liman ho liman ida de’it, nune’e rai ida labele halo dame ho parte ida de’it ka ho nia an rasik. Atu hetan dame presiza parte rua hotu.” — Juñu 1996 iha Universidade Hebraika iha Jeruzalén

Buat ruma la los

Iha Travessa de Ainaro, munisipiu Dili, besi rin hamrik los iha dalan klaran

Loke estrada maibe, lahatene los, sira halo planu dunik ka lae? Oinsá mak bele halo luan estrada maibe husik hela besi rin hamrik los iha dalan klaran? Atu obriga kareta ka motor sira atu soke malu karik?

Hare halo planu no implementa planu. Osan Governu selu ba halo projeto ho didiak, laos atu rai osan iha bolsu. Projetu atu fo benefísiu ba povu, laos prejudika povu. No povu mos tenki loke matan hodi hare: buat barak la los iha Timor-Leste.