Señor Prezidenti…

tmr
Taur Matan Ruak, Prezidente Timor-Leste nian, eleitu iha tinan 2012

Señor Prezidenti, iha rai Timor-Leste ema hotu-hotu iha direitu ba liberdade de expressão, katak, direitu atu koalia sai saida de’it mak ita hanoin.

Maibe Señor Prezidenti, direitu ba liberdade de expressão mos iha limite, katak, ita labele hatun, tolok ka difama ema seluk, tamba ita nia direitu ba liberdade hakotu-an wainhira ema seluk nia liberdade hahu.

Señor Prezidenti, ita bo’ot ba koalia iha Parlamentu Nasional hodi difama líder timoroan nain rua: Xanana Gusmão no Mari Alkatiri. Tamba-sá tenki difama líder nain rua ne’e Señor Prezidenti?

Maibe Señor Prezidenti, ita bo’ot koalia, hatudu liman ba sira nain rua, maibe la aprezenta prova ruma. Ibun de’it. Hau fiar katak Señor Prezidenti hatene katak wainhira ita akuza ema ida, ita tenki aprezenta prova ruma, tamba tuir regra ne’ebe iha, ema se de’it ita tenki konsidera inosenti to’o ita bele hatudu prova katak ema ne’e halo sala dunik. Tamba-sá la hatudu prova ruma Señor Prezidenti?

Señor Prezidenti, ita bo’ot iha dever atu garante unidade iha Estado nia laran.

Maibe Señor Prezidenti, ita bo’ot nia liafuan iha Parlamentu Nasional atu hafahe malu fali. Tamba-sá Señor Prezidenti?

Señor Prezidenti, ita bo’ot dehan katak atu ba Parlamentu Nasional atu koalia kona-bá ezonerasaun Major-Jeneral Lere Anan Timur no nomeasaun Brigadeiru-Jeneral Filomeno Paixão.

Maibe Señor Prezidenti, ita bo’ot aproveita oportunidade atu hatudu liman no difama Xanana Gusmão no Mari Alkatiri nian. Tamba-sá Señor Prezidenti?

Tamba-sá ita bo’ot lohi ita?

Tamba-sá ita bo’ot la kumpri ho ita bo’ot nia dever?

Tamba sá?

Advertisements